طاجن اللحمة بالعجين من الاطباق السريعة التى اشتهرت بها المطاعم ويقدم فى الاعياد والمناسبات
المقادير
بصل
خضار مشكل ( بسلة وجزر وبطاطس اى خضار متوفر )
قرن شطة حامى او بارد حسب الرغبة
لحمة مقطعة قطع صغيرة
ملح وفلفل اسود
بهارات لحمة
فص ثوم مفروم
معلقتين كبيرة صلصة
2 حبة طماطم مبشورة
معلقة سمنة او زبدة
ورق لورا
فص مستكة
معلقة صغيرة سكر
الطريقة
فى طاسة على النار هنزل فيها معلقة سمنة وننزل اللحمة وعليها ورق لورا ( ورق الغار ) رشة حبهان بودر وفص مستكة وفلفل اسود ونشوح اللحمة كويس وبعدين ننزل عليها بالبصل و فص الثوم ونقلب وبعدين ننزل بالخضار بتاعنا ونقلب تقلبتين وننزل الصلصة والطماطم المبشورة ومعلقة السكر والملح وبعدين نجيب الطاجن بتاعنا وننزل فيه الخضار باللحمة ونزود ماية لحد نص الطاجن تقريبا ونغطيه بورق فويل وندخله الفرن لحد مايستوى
لما يكون الطاجن داخل على سواه ( تلات تربع سواه )
لتجيهز العجينة
2 كوب دقيق
رشة ملح
معلقة خميرة
معلقة صغيرة سكر
معلقة كبيرة خل
رشة بيكنج صودا
ماء دافئ للعجن
طريقة التحضير
هنحط كل المقادير على بعض ونعجن بالماء ونسبها تخمر وبعد ما تخمر نفردها على قد حجم الطاجن وبعد ما استوى الطاجن نفردها عليه وندهن الوش اما بيض ومعلقة خل او زيت ونرشه بالسمسم وحبة البركة حسب الرغبة وندخله الفرن تانى لحد ما العجين يستوى ويحمر ونخرجه مبياخدش وقت خالص نخرجه ونقدمه ساخن
طريقة عمل الدجاج المشوي فى الفرن بتتبيلة مميزة
المقادير
٣ حبات طماطم
٢ قرن شطة حامى وبارد حسب الرغبة
عدد ٢ بصلة
معلقتين كبار دبس الرمان
ربع كوب لبن حليب او علبة زبادى او لبن رايب
معلقة كبيرة خل ابيض
معلقة ملح
معلقة صغيرة فلفل اسود
معلقة صغيرة كارى
نص معلقة صغيرة بابريكا
ربع ملعقة صغيرة زنجبيل مطحون
رشة قرفة مطحونة
معلقتين كبار زيت
رشة كبابة صينى مطحونة او جوزة الطيب
طريقة التحضير
اول حاجة هنغسل الفراخ بتاعتنا كويس ونعمل فيها فتحات بالسكينة عشان تشرب كل التتبيلة
هنضع كل المقادير مع بعض فى الخلاط ونضربهم كويس وننزل بيهم على الفراخ ونحشى تحت الجلد وفى الفتحات اللى عملناها ونغطيها تماما بالحشوة ونغطيها ونتركها ليلة كاملة فى الثلاجة او على الاقل ٤ ساعات
بعد كدة نرصها فى صينية ونضع عليها باقى التتبيلة وحوالى كوباية ماية ونغطيها بورق زبدة وبعدين ورق الومنيوم ونضعها في فرن ساخن مسبقا على درجة حرارة عالية على الرف الاوسط لمدة تلت ساعة وبعدين نهدى النار شوية
ونتركها تكمل سواها وبعدين اخر خمس دقائق نشيل الورق ونتركها تحمر وندهن الوجه بفرشاة من خليط السوائل اللى بينزل من الفراخ عشان تفضل بتلمع
ممكن نضع تحت الفراخ اى خضار تفضلوه او لا براحتكم
وفى الاخر ممكن نولع فحمة ونضعها فى ورق فويل ونضعها فى الصنية ونطفيها بمعلقة زيت ونغطى الصنية ونسبها تاخد كل ريحة الفحم وبتبقى طعمها تحفة
