ماهى متلازمة كلاينفلتر - موسوعة انا عربي

سمعنا كثيرا عن متلازمة كلاينفلتر فهو من الامراض الوراثية الذكورية واليوم نتعرف على اعراض هذا المرض وطرق العلاج

البعض من حضراتكم سمعوا عن المتلازمة دى لما كانوا طلاب فى المدرسة الثانوية , فى مقررات الأحياء بتاعت ثانوى , وبعضكم سمع المصطلح أو قراه فى مكان ما من غير ما يلفت نظره إنه يدور على معناه .

متلازمة كلاينفلتر ببساطة , متلازمة وراثية بتصيب الأطفال الذكور , يعنى مبتظهرش إلا فى الذكور .

معظم حضراتكم يعرف إن الذكر الطبيعى, الكروموسومات_الجنسية عنده أتنين, واحد مذكر وواحد مؤنث , علشان كده الذكر هو اللى بيتحكم فى نوع المولود , لأن هو بس اللى عنده النوعين من الكرموسومات , المذكرة والمؤنثة .

المرأة عندها كروموسومين الأتنين مؤنثين, فلو لقحها الكروموسوم المؤنث من الرجل بتحمل جنين بنت, لأن هنا الكروموسومين بتوع الجنين بيكونوا الأتنين مؤنثين , إنما لو لقحها كروموسوم مذكر من الرجل بتحمل جنين ذكر , لأنه هيكون حامل للكروموسوم المؤنث بتاعها والمذكر بتاع زوجها .

الطفل الكلاينفلتر بقى , بيكون عنده بدال الكروموسومين تلاتة , واحد مذكر , وإتنين مؤنثين

فهو من الناحية التشريحية ذكر , لأن عنده الكروموسوم الذكرى إللى إداله مؤهلات الذكورة , يعنى عنده خصيتين وعضو ذكرى .

لكن لأن الكترة تغلب الشجاعة , الأتنين كروموسوم المؤنثين , بيحجموا وظايف الكروموسوم المذكر , يخلوها قاصرة , مش مكتملة , يعنى هو تشريحيا ذكر , إنما وظيفيا وشكليا , مش ذكر تماما , ذكر بصفات أنثوية

الأعراض

الأعراض هنا بتنقسم لأعراض بتظهر على الطفل قبل البلوغ, وأعراض بتظهر على الطفل بعد الوصول لسن البلوغ , كمان الأعراض بتختلف من عيان للتانى , يعنى مش شرط كلها تظهر على مريض واحد .

معظم الحالات كمان مش بتكتشف إلا بعد الوصول لسن البلوغ , قبل سن البلوغ الأهل غالبا مبياخدوش فى بالهم

الأعراض على الأطفال

ممكن الطفل يتولد والخصيتين مش موجودين فى كيس الصفن ويتأخروا فى النزول.

تأخر النمو الحركى للطفل , يعنى يتأخر فى القعاد , فى الحبو , فى الوقوف , فى المشى ……

تأخر النمو المعرفى , يعنى يتأخر فى الإدراك وفى الكلام وفى تعلم المهارات المختلفة للأطفال .

ظهور صعوبات التعلم , يعنى تلاقى الطفل صعب جدا يتعلم القراءة والكتابة والحساب والمهارات التعليمية البسيطة للأطفال فى سن المدرسة , وتلاقى أمه بيطلع عينها علشان تعلمة يكتب الحروف مثلا أو الأرقام, أو تفهمه إن واحد وواحد مجموعهم اتنين , ببساطة بيبقى طفل فهمه على قده .

ضعف عضلات الطفل .

قصر قامة الطفل عن أقرانه .

زيادة طول الساقين ونقص طول الجزع , يعنى تحس ان الطفل طويل من نصفه السفلى وقصير من نصفه العلوى .

إتساع الحوض وكأنه حوض بنت مش ولد .

الهدؤ والميل للإستكانة , يعنى تلاقى الطفل مش شقى زى الأطفال الأولاد , إنما هادى تماما زى البنات .

صغر حجم الخصيتين والقضيب وصلابة الخصيتين .

الخجل المبالغ فيه , تلاقى الطفل بيتكسف يتكلم أو يعبر عن نفسه أو يتعامل مع حد وحساس جدا وميال للعزلة

أعراض ما بعد الوصول إلى مرحلة_البلوغ .

تأخر البلوغ وخاصة العلامات الظاهرية للبلوغ زى خشونة الصوت وظهور اللحية والشارب وشعر العانة .

ضعف العضلات , يعنى تلاقى الولد كأنه بنت , لا بيقدر يشيل شيلة مثلا ولا يتخانق مع حد ولا يمارس رياضات الأولاد وتكوينه العضلى أضعف من الولاد اللى فى سنه .

الخجل والحساسية الزايدة .

ضعف العظام .

خفة شعر الوجه والجسم .

قصر القامة .

صغر الخصيتين والقضيب وتصلب الخصيتين .

التثدى (زيادة نمو الثديين ).

إنخفاض الدافع الجنسى (الرغبة الجنسية).

زيادة دهون البطن .

العقم نتيجة قلة الحيوانات_المنوية أو إنعدامها تماما .

الأسباب

منقدرش نعتبر إن الحالة لها أسباب معروفة , يعنى مفيش حاجة نقدر نقول إنها لو اتعملت تزود نسبها ولو متعملتش بتقلل حدوثها , غير إن كبر سن الأم وقت الإنجاب ممكن يزود نسبة حدوثها شوية .

مضاعفات المتلازمة

الضعف الجنسى أو العجز الجنسى.

العقم .

أمراض القلب والأوعية الدموية نتيجة زيادة الكوليسترول والدهون الثلاثية.

الإصابة بسكر النوع الثانى .

أمراض الصدر .

سرطان الثدى .

أمراض المناعة_الذاتية زى الذئبة الحمراء والروماتويد.

مشكلات الفم والأسنان زى تسوس الأسنان وضعفها وسقوطها .

هشاشة العظام .

إضطراب التوحد .

مشكلات نفسية واجتماعية زى الإكتئاب والعزلة والرهاب الإجتماعى .

تشخيص المتلازمة

التشخيص ممكن يتم أثناء الحمل

, بفحص كروموسومات الجنين عن طريق عينة من السائل الأمنيوسى .

تحليل الكروموسومات

تحليل الهرمونات

وطبعا بيفضل إكتشاف الحالة بدرى , لأن مضاعفات الحالة عموما بتنتج عن قلة الهرمون الذكرى (التستستيرون) , فالعلاج بالهرمون الذكرى بيقلل من المضاعفات إلى حد كبير لو بدأ وقت البلوغ مباشرة.

العلاج

العلاج فى حالات متلازمة كلاينفلتر بيكون بأكتر من تخصص , لأنه بيكون على أكتر من محور .

العلاج الهرمونى بيكون بإشراف طبيب الأمراض التناسلية .

علاج التثدى بيكون بإزالة أنسجة الثديين جراحيا .

الطفل بيحتاج لتخصص التخاطب علشان يتعلم الكلام .

محتاجين كمان حد متخصص فى علاج صعوبات التعلم وإلا الطفل ده ممكن ميعرفش يتعلم .

الطبيب الباطنى بيتابع نسب السكر وكوليسترول ودهنيات الدم ومضاعفات المرض على القلب والشرايين .

ممكن مساعدة الإنجاب عن طريق الحقن_المجهرى بسحب عينة من الخصية وتلقيح البويضة بالحيوانات المنوية الموجودة فيها إن وجدت .

طبعا بنحتاج لطبيب نفسى لعلاج المشكلات النفسية والإجتماعية للمريض ده علشان يقدر يتكيف مع أسرته ومجتمعه .

لكن لازم نكون فاهمين إن المتلازمة ملهاش علاج نهائى , هدف العلاج هنا هو تقليل المضاعفات على الصحة العامة للعيان , علشان كده بيستمر مدى الحياة .

أتمنى أكون قدرت أدى لحضراتكم فكرة معقولة عن متلازمة_كلاينفلتر , لأنها متلازمة موجودة حوالينا وللأسف بنتنمر على أصحابها مع إن ملهمش يد فيها , يكفى إن المريض ده من وهو طفل كل أصحابه وحتى أهله أحيانا مسميينه (الولد البنوتة)

ربما تحتوي الصورة على: ‏‏‏زهرة‏‏، ‏نص مفاده '‏دكتور كشكول‏'‏‏

أغرب ما قيل عن كورونا

طبعا إحنا بطبيعتنا , بنحب ندمج أى حاجة مع تراثنا , نضيفلها طابعنا , ومن طبعنا إننا لازم نفتى عن أى حاجة فى الدنيا , ونقول عنها معلومات ملهاش علاقة بيها أصلا , ونتعامل معاها بإعتبارها حقيقة مسلم بيها , وطبعا طبيعى إن كورونا , لازم ينوبه من الفتى جانب , ده معاشرنا بقاله أكتر من سنة

إتقال عن كورونا معلومات كتير جدا

, الناس إعتبرتها حقائق , مع إن ملهاش أى علاقة بالحقيقة لا من قريب ولا من بعيد , علشان كده قلنا نيجى نصححها هنا

إختبار النفس : اتقال إن من طرق الكشف عن كورونا , إنك تحبس نفسك لمدة عشر ثوانى , لو قدرت تعمل كده يبقى معندكش كورونا

والله العظيم فيه رياضيين كانوا بيجروا كل يوم عشرة كيلو فى خمس دقايق , وهما عندهم كورونا , مفيش أى علاقة بين قدرتك على حبس أنفاسك وبين إصابتك بكورونا من عدمها

الكلوروكين بيقى من كورونا خده إحتياطى : الكوروكين ممكن يسبب مضاعفات خطيرة ملهاش علاج لو اتاخد بدون داعى وبدون إشراف طبى, أبسطها ضعف البصر اللى ممكن يوصل للعمى ,غير إنه مازالت قدرته على علاج إصابات_كورونا قيد البحث , ومبيجيبش نتيجة فى كل الحالات , فمفيش داعى نتسبب فى إختفائه من السوق على الفاضى , فيه مرضى محتاجينه ومش لاقيينه .

الإستحمام بالمية السخنة جدا بيقى من كورونا : الإستحمام بالمية السخنة جدا فى الحقيقة بيسبب ظهور مضاعفات أكتر من اللى هيسببها كورونا , زى جفاف الجلد وتساقط الشعر والأكزيما وحروق الجلد , لكن لو كانت المية مغلية حتى , مش هتقيك من فيروس كورونا , فإستحمى بالمية الفاترة أحسنلك .

اللى أصيب بكورونا مرة مبيصابش تانى : الحقيقة الكلام ده ينطبق على الحصبة , مش على كورونا , فيه ناس أصيبت مرة , وإتنين , وتلاتة

فيه علاج لكورونا , بس بيدوه للناس المهمين بس : لو الكلام ده حقيقى , مكانوش أمراء ووزراء ونجوم سينما عالمية وشخصيات عامة معروفة , ماتوا بكورونا

كورونا حتى هذه اللحظة ملوش علاج , بيتم التعامل مع أعراضه ومضاعفاته لغاية ما الجهاز_المناعى

يتغلب عليه .

الكواشف الحرارية تكشف إصابات كورونا : الكواشف الحرارية زى ماهو واضح من إسمها , بتكشف إرتفاع الحرارة , أيا كان سببه , حتى لو كان إلتهاب بواسير , مش متخصصه فى حرارة_كورونا يعنى , هى مجرد إحتياط مش أكتر .

لو مفقدتش حاسة_الشم , يبقى معندكش كورونا : فقدان حاسة الشم مش شرط لكورونا

, ممكن تحصل إصابة كورونا من غيره , وممكن هو كمان يحصل من غيرها .

الشيخ مختار العطار عنده علاج لكورونا : لو كان الكلام ده حقيقى كان الراجل ده أخد جايزة نوبل فى الطب, الوصفة دى إما مجرد خلطة أعشاب موجودة فى كل مطابخ العالم, أو خلطة أعشاب إنت متعرفش محتواها إيه, ممكن تسببلك مشاكل أكبر من كورونا واللى ممكن يسببه, الأشياء المفيدة بدون ضرر بالمرة موجودة فى الجنة وبس, ربنا يوعدنا بيها جميعا إن شاء الله .

دى كانت بعض الفتاوى عن فيروس كورونا

, بعد مرور أكتر من سنة على إبتلائنا بيه , اللى يعرف من حضراتكم أى إفتاكاسات تانية ممكن يوافينا بيها ونناقشها مع بعض للتوضيح والإفادة .

تحياتى